«Еркектер Марстан, әйелдер Шолпаннан»: Махаббатыңызды баянды етер 3 маңызды қадам
Көп жағдайда біз кезінде бір-біріне ынтызар болған ғашықтардың сезімі неге суып кеткенін, ал көп жыл отасқан жандардың мардымсыз бір нәрсе үшін неге екі жаққа кеткенін ойлап жатамыз. Бұл қалай болды? Неге бұл біздің басымызға келді және махаббат отының сөнбеуі үшін не істеуіміз керек? Махаббат та, неке де күтімді қажет етеді. Қарым-қатынас ұзаққа созылуы үшін тиісті стратегияларды қолдану маңызды. «Еркектер Марстан, әйелдер Шолпаннан» атты бестселлер кітаптың авторы кез келген қарым-қатынастың жақсы жағы болатынын, бастысы — сол қолда бар құнды сезімді қалай сақтап қалуда екенін айтады. Еркек пен әйелдің жынысы бөлек болғандықтан, қарым-қатынас, таным және өзара түсіністік мәселелерінде айырмашылықтар өте көп.
Бұл кітап — американдық танымал психолог Джон Грейдің ең таңдаулы туындыларының бірі. Ол жарық көрген сәттен бастап-ақ ерлер мен әйелдердің сүйікті кітабына айналып, екі жыныс арасындағы қарым-қатынас туралы ең іргелі еңбектердің бірі ретінде танылды. Бұрын мен ғашықтардың неге ұрысатынын, тіпті бір-бірімен өліспей-беріспей айтысатынын түсінбейтінмін, бұл менің бойымда махаббатқа деген қорқыныш ұялатқан еді. Бірақ Грейдің осы кітабын оқып шыққан соң, бәрін түсіндім: сезімді сақтау үшін еркек пен әйелдің айырмашылығын сезініп, "әркімге өз тілінде" қарау керек екен. Күнделікті сұрқай өмір махаббаттың нұрымен суарылуы тиіс, сонда ғана сезім гүлі ешқашан солып қалмайды.
01: Сөйлесе білу
Менің жақын құрбым Сяо Чжэн мен оның жігітінің қарым-қатынасы қызығарлықтай тамаша. Екеуі де сөйлесе біледі, тіпті кішкене түсініспеушілік болса да, мәселені сол күні шешуге тырысады. Сондықтан олардың арасы әрдайым суыған емес. Бірақ бірде Сяо Чжэн қатты ренжіді. Бәрі жігітінің бір әрекетінен басталған еді, шын мәнінде Сяо Чжэн сәл ғана көңілсіз күйде болған. WeChat арқылы сөйлескенде Сяо Чжэн өз сезімін жігітіне айтты, бірақ жігіті: «Сяо Чжэн, осыған бола ренжуге тұра ма?» деп жауап берді. Осы "тұра ма?" деген сөз оның шамына тиді. Бастапқыда сәл ғана көңіл-күйі болмаса, енді ол шын мәнінде ашуланды. Кітапта айтылғандай, бұл — ерлер мен әйелдердің қарым-қатынас стиліндегі типтік айырмашылық. Әйелдер өз эмоциясын білдіруді ұнатады, ал еркектер қарсы тарап "мәселені шешіп бер" деп тұр деп ойлайды.
Шындығында, әйелге мәселенің шешімі емес, жай ғана өз сезімін білдіріп, қарсы тараптан қолдау мен мақұлдау алу маңызды. Сяо Чжэн үшін жігітіне көңілі толмағанын айту — оның түсіністік күткені еді. Ал жігіті мұны "болмашы нәрсе" деп қабылдап, жұбатқысы келгенімен, керісінше әрекет жасап, қызына "сенің сезімің мен үшін маңызды емес" деген сигнал беріп қойды. Бақытымызға орай, екеуі сәл суыған соң қайта сөйлесіп, мән-жайды түсіністі. Бұл олардың бұрыннан қалыптасқан сөйлесу мәдениетінің арқасы еді. Егер мұндай мәселелер шешілмесе, уақыт өте келе әйел "мені түсінбейді" деп, ал еркек "бәрін тырнақ астынан кір іздеп үлкейтеді" деп ойлап, араларында жарықшақ пайда болады.
02: Сабыр сақтай білу
Әйел адамнан демалыс күндері не істейтінін сұрасаңыз, көбіне: "Құрбыларыммен кездесіп, дәмді ас ішіп, жұмыс пен өмірдегі қиындықтарды айтып, ішімді босатып қайтамын" деп жауап береді. Ал еркектерде бәрі басқаша. Олардың жолы болмай қалса, бірден өзін оқшаулап, жоқ болып кетеді, ешкіммен сөйлеспейді. Олар өздерінің «үңгіріне» тығылып, мәселені өз бетінше шешкісі келеді, бірақ бұл кезде қасындағы адамның сезімін ұмытып кетеді. Мәселенің шешімін тапқан соң ғана үңгірінен шығып, бұрынғы қалпына келеді. Егер әйел бұл ерекшелікті түсінбесе, жігітінің сезімі суыды немесе маған көңіл бөлмей кетті деп ойлайды. Мұндай сәтте әйелге тек бір нәрсе керек: еркекке жеке кеңістік пен уақыт беріп, мәселесін өз бетінше реттеуіне жағдай жасау. Оны қинап сөйлетудің, басындағы стрессін айтқызудың қажеті жоқ. Бұл еркекті одан сайын тұйықтап, қашырта түседі. Егер екі жақ бір-бірінің стресстен арылу тәсілдерін түсінсе, қарым-қатынас әлдеқайда жайлы болады.
03: Түсіністік таныта білу
Жақында ғана көрсетілген «Бізде бәрі жақсы болады» атты сериалда Лю Тао мен Ян Шо ажырасудың алдында тұрған ерлі-зайыптылардың рөлін сомдады. Кейіпкер Сян Цянь қарапайым қызметкерден басшылыққа дейін көтеріліп, отбасы үшін аянбай еңбек етеді, бірақ әйеліне көңіл бөлу мен қасында болуды ұмытып кетеді. Сян Цяньның ойынша, ол әйелі мен баласын молшылықта ұстаса, соның өзі жеткілікті. Бірақ ол әйеліне ең алдымен жылулық, қолдау және серік болу керек екенін түсінбеді. Ұзақ уақытқа созылған жалғыздық әйелін тіпті депрессияға ұшыратты. Олардың сәтсіз некесі — ер мен әйелдің ойлау жүйесіндегі айырмашылықтың қарым-қатынасқа қаншалықты ауыр соққы болатынының айқын дәлелі. Сондықтан, ер мен әйелдің айырмашылығын ескермеуге болмайды. Тек қарсы тараптың шынайы мұқтаждығын түсініп, оған сол адам қабылдай алатын тәсілмен қамқорлық жасау ғана — нағыз дені сау, үйлесімді махаббат.
Махаббат — оңай шаруа емес, біз сезімімізге мұқият болуымыз керек. Егер сіз қазір қарым-қатынас құрып жүрген болсаңыз, «Еркектер Марстан, әйелдер Шолпаннан» кітабын міндетті түрде оқыңыз. Ол сізге сезіміңізді нығайтып, махаббатыңызды тәтті ете түсуге көмектеседі.
Сүйіктіңізге дұрыс тіл таба біліңіз, оның қалауына сай түсіністік танытыңыз, сабырмен мәселелерді шешіңіз. Сонда ғана махаббат жолыңыз ашық, қарым-қатынасыңыз баянды болады.
Махаббат — бұл тек сезім емес, бұл күнделікті жасалатын таңдау мен еңбек.
Пікірлер (0)
Пікір жазу үшін аккаунтқа кіріңіз. Кіру